मंगल बेघा
९ पौष, पाँचथर । ११ औं संस्करणको फाल्गुनन्द गोल्डकप फुटबल प्रतियोगिता- २०८१ अन्तर्गत मंगलबार हुने खेलमा न्यु स्टार क्बल, सुनसरीले मछिन्द्र फुटबल क्बल, काठमाण्डौंको सामना गर्दैछ ।
फिदिम माविको खेलमैदानमा दिउँसो २ः०० वजे हुने दोस्रो क्वाटर फाईनलमा न्यु स्टारले ए डिभिजन क्बल मछिन्द्रको सामना गर्ने भएको हो । मछिन्द्रले प्रि–क्वाटरमा डिफेन्डिङ च्याम्पियन झापा- ११ फुटबल क्बल, झापालाई ५-० को फराकिलो अन्तरले पाखा लगाउँदै अन्तिम ८ मा स्थान सुरक्षित गरेको थियो । न्यु स्टार भने प्रतियोगितामा पहिलो पटक मैदान उत्रदैछ ।
राष्ट्रिय खेलाडीले भरिएको मछिन्द्र र मोफसलको न्यु स्टारबीच हुने खेलको विजेताले अन्तिम चारमा स्थान सुरक्षित गर्नेछ । मछिन्द्रसँग देवेन्द्र तामाङ, विजु भुजेल, उत्सव राई जस्ता स्टार खेलाडीको साथ छ भने न्यु स्टारसँग शुसिल लिम्बू, मिलन राई लगायतका खेलाडीकाे साथ छ ।
प्रतियोगिताको विजेताले नगद १० लाख ५ सय ५५ रुपैयाँ सहित ट्रफी, मेडल र प्रमाण–पत्र प्राप्त गर्नेछ । यसै गरी, उपविजेताले नगद ५ लाख ५ सय ५५ रुपैयाँ सहित ट्रफी, मेडल र प्रमाण–पत्र प्राप्त गर्ने क्लबका अध्यक्ष दिपेन्द्र थापा मगरले जानकारी दिए ।
यसै गरी, व्यक्तिगत विधा तर्फ सर्वोत्कृष्ट खेलाडीले इभी स्कुटर प्राप्त गर्नेछ भने सर्वाधिक गोलकर्ताले नगद १५ हजार पुरस्कार हात पार्नेेछन् । यसै गरी, उत्कृष्ट गोलरक्षक, डिफेन्डर, मिडफिल्ड, फरवार्ड र प्रशिक्षकले जनही १० हजार पुरस्कार प्राप्त गर्ने आयोजकले जनाएको छ । उदयमान खेलाडीलाई पनि १० हजार पुरस्कार प्रदान गरिने क्लबका अध्यक्ष थापा मगरले जानकारी दिए । प्रतियोगिताको हरेक खेलका म्यान अफ दि म्याच हुने खेलाडीलाई समेत जनही १० हजार नगद पुरस्कार प्रदान गरिने क्लबले जनाएको छ ।
प्रतियोगिताको फाईनल खेल पौष १५ गते फिदिम माविको खेल मैदानमा हुनेछ । प्रतियोगिताको मूख्य प्रवद्धक फिदिम नगरपालिका रहेको छ भने प्राविधिक सहयोग पाँचथर जिल्ला फुटबल संघले गरेको छ ।
प्रकाशित मिति : ९ पुस २०८१, मंगलबार १० : २३ बजे
प्रतिक्रिया