मंगल बेघा
२ पौष, पाँचथर । ब्याडमिन्टन खेलाडी प्रबिन्द्र योक्पाङदेनलाई ब्याडमिन्टन संघ पाँचथरले फिदिममा सोमबार सम्मान गरेको छ ।
फिदिम नपा ४ स्थायी ठेगाना भई हाल सिंगापुर प्रहरी सेवामा कार्यरत योक्पाङदेनलाई संघको तर्फवाट पूर्वमन्त्री एवं प्रतिनिधिसभा सदस्य बसन्तकुमार नेम्बाङले सम्मान पत्र हस्तान्तरण गर्नुका साथै जिल्ला समन्वय समितिका प्रमुख रामराज आङदेम्बेले दोसल्ला ओढाएर सम्मान गरेका हुन् । फिदिममा पुर्ननिर्माण गरिएको ब्याडमिन्टन कर्वड हल उद्घाटनको अवसरमा उनलाई सम्मान गरिएको हो ।
योक्पाङदेनले ब्याडमिन्टन खेलका हात पारेको सफलताको कदर गर्नुका साथै संघको नाम देश विदेशमा पहिचान गराउन सफल भएकाले उनलाई सम्मान गरिएको संघका अध्यक्ष तेजबहादुर तुम्बापोले बताए । उनले पोखरामा सम्पन्न २९ औं राष्ट्रिय ब्याडमिन्टन च्याम्पियनसीप– २०५९ मा यू– १६ एकल पुरुष तर्फ प्रथम स्थान हाँसिल गरेका थिए ।
पाँचथर ब्याडमिन्टन संघवाट खेल सुरु गरेका उनी सिंगापुर प्रहरीमा प्रवेश गरेपछि भने नेपालमा खेल्ने अवसर पाएनन् । प्रहरी सेवामै रहँदा समेत सिंगापुरमा आयोजित विभिन्न प्रतियोगिताहरुमा सहभागी भई उपाधि हाँसिल गरेको उनकी दिदी ब्याडमिन्टन खेलाडी सकुन योक्पाङदेन नेम्बाङले जानकारी दिईन् ।
प्रकाशित मिति : २ पुस २०८१, मंगलबार ८ : ३३ बजे
प्रतिक्रिया