मंगल बेघा
४ साउन, पाँचथर। एसीसी वुमन्स एसिया कपमा नेपालले विजयी सुरुवात गरेको छ । श्रीलंकाको डाम्बुलामा शुक्रबार भएको उद्घाटन खेलमा नेपालले यूएईमाथि ६ विकेटको ऐतिहासिक जित हात पार्दै प्रतियोगितामा सुखद सुरुवात गरेको हो ।
यूएईले प्रस्तुत गरेको ११६ रनको लक्ष्य पछ्याएको नेपालले ओपनर सम्झना खड्काको उत्कृष्ट ब्याटिङमा सहज जित हाँसिल गरेको हो । नेपालले १६.१ ओभरमा ४ विकेट गुमाउँदै लक्ष्य पूरा गर्यो । नेपालको जितमा सम्झना खड्का ४५ बलमा ११ चौकासहित ७२ रनमा नट आउट रहिन् । पूजा महतो ७ रनमा नट आउट रहिन् । सीता रानामगर ७, कविता कुँवर २, इन्दु बर्मा ६ र रुविना क्षेत्री १० रनमा आउट भइन् ।
![](https://i0.wp.com/shaktipost.com/wp-content/uploads/2024/07/501.jpg?resize=720%2C480)
यूएईकी कविसा कुमारीले ४ ओभरमा १ मेडनसहित १२ रन खर्चेर ३ विकेट लिइन् ।
त्यसअघि टस हारेर पहिला ब्याटिङको निम्तो पाएको यूएईले २० ओभरमा ८ विकेट गुमाउँदै ११५ रन बनाएको थियो । यूएईकी युवा ब्याटर खुसी शर्माले ३९ बलमा २ चौकासहित सर्वाधिक ३६ रन बनाइन् । कप्तान ईशा ओझा १०, रिनिथा रजिथा ६, थीर्थ सतिश ९ र समिरा धर्निधर्क १३ रनमा आउट भइन् भने काविशा कुमारी २६ बलमा २ चौकासहित २२ रनमा आउट भइन् ।
नेपालका लागि कप्तान इन्दु बर्माले ४ ओभरमा १९ रन खर्चेर ३ विकेट लिइन् भने कृतिका मरासिनीले २ ओभरमा १५ रन खर्चेर १ विकेट लिइन् । यसै गरी, सबनम राइले ३ ओभरमा २७ रन खर्चेर १ विकेट लिइन् भने कविता जोशीको नाममा १ विकेट लिईन् ।
नेपालको आगामी खेल
६ साउन गते : नेपाल विरुद्ध पाकिस्तान
साउन ८ गते : नेपाल विरुद्ध भारत
फाेटाे- दिपक मल्लिक
प्रकाशित मिति : ४ श्रावण २०८१, शुक्रबार ७ : ४८ बजे
प्रतिक्रिया