६ जेठ, पाँचथर । पाँचथरका उदय केरुङले सर्वोच्च शिखर सगरमाथा चुमेका छन् । फालेलुङ गाउँपालिका ३ का ३३ वर्षीय केरुङले आइतबार बिहान ६ बजेर ८ सेकेन्डकाे समयमा सगरमाथा चुमेका हुन् ।
एट–के एक्सपिडिसन ट्रेकिङ कम्पनी मार्फत सगरमाथा आरोहण गरेका उनी बिहिबार मध्यरातमा आधार शिविरबाट आरोहण दलका २२ जना सदस्यसँगै शिखरको चुचुरो तर्फ प्रस्थान गरेका थिए । कम्पनीका व्यवस्थापक पेम्बा शेर्पाका अनुसार आरोहण दलमा सहभागीमध्ये अधिकांशले बिहान ७ बजेभित्र सगरमाथाको सफल आरोहण गरिसकेका छन् ।
केरुङले यस अघि मनास्लु र मेरा पिक हिमालको सफल आरोहण गरेका थिए । सगरमाथा आरोहण गर्ने केरुङ पाँचथरका दोस्रा आरोही हुन् । यस अघि कुम्मायक २ मङजावुङका सुशील शेर्माले सगरमाथा आरोहण गरिसकेका छन् ।
प्रकाशित मिति : ६ जेष्ठ २०८१, आइतबार १० : १६ बजे
प्रतिक्रिया