पत्नीको रिसले एक महिनादेखि रुखको बास !

लोग्नेस्वास्नी बीच स-साना नोकझोंक हुनु अनौठो होइन । तर लोग्ने स्वास्नीको झगडा परालको आगो भनेझैं रिस शान्त भएसँगै झगडा साम्य हुन्छ । कहिलेकाही मनमुटाव लामो समयसम्म पनि चलिरहेको हुन्छ । एकै घरभित्र बसेर पनि कतिपय पति पत्नी कैयन् दिनसम्म बोलचाल नै बारेका हुन्छन् । यस्तै एउटा घटना छिमेकी मुलुक भारतको उत्तर प्रदेशमा भएको छ ।
पत्नीको रिसका कारण ती व्यक्ति पछिल्लो करिब एक महिनादेखि एक सय फिट अग्लो ताडको रुपमा चढेका छन् । उनले रुखमा नै ओछ्यान लगाएर सुत्ने र त्यहीँ नै खानपिन गर्ने गरेका छन् ।
उत्तर प्रदेशको मउ जिल्लास्थित बसारथपुर गाउँमा यो घटना भएको हो । त्यहाँका रामप्रवेश नामका एक व्यक्ति पछिल्लो एक महिनादेखि गाउँमा रहेको एउटा एक सय फिट अग्लो ताडको रुपमा बसिरहेका छन् । ती व्यक्तिप्रति गाउँलेहरू आक्रोशित बनेका छन् । उनको बारेमा प्रहरीमा जानकारी दिइएको छ र प्रहरीले त्यसको भिडियो बनाएर लगेको छ ।
एक रिपोर्ट अनुसार रामप्रवेश अहिले पनि रुखमै बसिरहेका छन् । स्थानीय मानिसहरुका अनुसार यदि कसैले उनलाई सम्झाउने र तल झार्ने प्रयास गर्योस भने रामप्रवेशले रुखमा राखेका इँटा र ढुंगाले आक्रमण गर्दछन् । त्यसैले त्यो रुखको नजिक गएर उनलाई सम्झाउने आँट पछिल्लो समय कसैले गर्न सकेका छैनन् ।
एक महिनासम्म रुखमा बसेर उनले के खाए होलान् ? भन्ने लाग्नु स्वभाविकै हो । तर उनका लागि खानपिनको व्यवस्था चाहिं उनकै घरबाट भएको छ ।
परिवारकै सदस्यहरुले उनलाई खाना र पानी ल्याइदिने गरेका छन् । रुखबाट उनले रस्सी तल झार्दछन् र त्यहीँ रस्सीमा परिवारले उनको लागि खानेकुराको झोला बाँधिदिन्छन् । गाउँलेहरुका अनुसार रामप्रवेश रातमा रुखबाट झर्दछन् र दिसापिसाब लगायतका आफ्ना अन्य क्रियाकलाप गरे पुनः रुखमा चढ्दछन्।
रामप्रवेश ताडको रुखमा चढेर एक महिनादेखि बस्दा उनको परिवारलाई मात्र होइन पूरै गाउँलाई समस्या भएको छ ।
गाउँको बीचमा रहेको अग्लो ताडको रुखमा उनी चढेर बसेपछि गाउँलेहरुको गोपनियतामै असर परेको छ । उक्त ताडको रुख निकै अग्लो भएकाले त्यसमा चढेपछि गाउँका सबैजसो घरका आँगन देखिन्छ ।
घरभित्र र बाहिरका क्रियाकलाप समेत उनले देख्ने गरेको गोपनियतामा असर परेको भन्दै गाउँका महिलाहरुले पनि प्रहरीमा उजुरी दिएका छन् ।
रामप्रवेश यसरी एक महिनादेखि रुखमा बसोबास गर्नुको कारण पत्नीसँगको झगडा रहेछ । उनका बुवा विशूनरामका अनुसार बुहारी माइतीबाट घर आएको दिन सधैं छोरा रामप्रवेशसँग झगडा पर्दछ । कहिलेकाहीँ त बुहारीले छोरालाई कुटपिट समेत गर्ने गरेको उनी बताउँछन् ।
पत्नीको त्यस्तो हर्कतबाट बेखुस भएर तथा पत्नीको कुटाइबाट बच्नका लागि उनी एक महिनादेखि घर छाडेर रुखमा बस्न थालेको विशूनराम बताउँछन् ।
अनलाईन खबर / एजेन्सी

प्रकाशित मिति : १२ भाद्र २०७९, आइतबार  ४ : ०६ बजे