हेँवा खोलाको मोडुलर ब्रिज उद्घाटन

४-भदौ, पाँचथर । फिदिम नगरपालिका- ४ र हिलिहाङ गाउँपालिका- ७ को सीमानामा रहेको हेँवा खोलाको मोडुलर ब्रिज बुधबार उद्घाटन भएको छ ।

संघीय सरकारका भौतिक पूर्वाधार तथा यातायात मन्त्री देवेन्द्र दाहाल र नेपालका लागि भारतीय राजदुत नविन श्रीवास्तवले हेँवाखोलमा आयोजित एक कार्यक्रमकाबीच संयुक्त रुपमा ब्रिजको उद्घाटन गरेका हुन् । मेची राजमार्गको फिदिम-भारापा सडकखण्डमा पर्ने सो खोलामा नेपालकै सवैभन्दा लामो ७० मिटरको मोडुलर ब्रिजको निर्माण कार्य हालै मात्र सम्पन्न भएको थियो ।

उद्घाटन समारोहलाई संबोधन गर्दै मन्त्री दाहालले ब्रिज निर्माणका क्रममा मृत्यू भएका मजदुरहरुको परिवारलाई जनही १ लाख रुपैयाँ सहयोग गर्ने बताए । समारोहलाई संबोधन गर्ने भारतीय राजदुत श्रीवास्तवले भारत सरकारले दिएको सहयोग सदुपयोग भएको भेन्दै धन्यवाद ज्ञापन गरे । भारत सरकारले नेपाललाई प्रदान गरेको १० ब्रिज मध्ये यो पनि एक हो ।

हेँवा खोलामा निर्माणाधिन ब्रिज भाँचिदा गत जेठ ३१ गते ३ जना मजदुरको मृत्यू भएको थियो भने अन्य ३ जना समेत घाईते भएका थिए । साे स्थानमा ब्रिज निर्माण गर्ने क्रममा मृत्यू भएका मजदुरहरुको स्मारक समेत निर्माण गरिएकाे छ ।

अघिल्लो वर्ष आएको बाढिले सो स्थानमा रहेको पक्की पुल बगाएपछि गत साल बेलिब्रिज निर्माण गरिएको थियो । सो पुल समेत गत साल आएको वाढिले बगाएपछि ब्रिज निर्माण कार्य अगाडि वढाइएको थियो ।

निर्माणाधिन पुलमा क्षती भएपछि पाँचथरका हिलिहाङ, याङवरक र फालेलुङ गाउँपालिकाका बासिन्दालाई यातायात सेवामा समस्या देखिएको थियो । यसै गरी, यही सडक प्रयोग गर्ने ताप्लेजुङका नागरिकले समेत वर्षातको सयमा सास्ती व्यहोर्नु परेको थियो।

प्रकाशित मिति : ४ भाद्र २०८२, बुधबार  ९ : ०० बजे