प्रतियोगिताको विजेताले ५ लाख नगद, ट्रफी, मेडल र प्रमाण पत्र प्राप्त गर्नेछ भने उपविजेताले २ लाख ५० हजार नगद, ट्रफी, मेडल र प्रमाण पत्रमा चित्त बुझाउनु पर्नेछ ।
मंगल बेघा
१९ चैत्र, पाँचथर । वाइ वाइ छैटौं अन्तराष्ट्रिय रवि गोल्डकप- २०८१ मा ८ टिमले प्रतिस्पर्धा गर्ने भएका छन् । आगामी चैत्र २५ गतेदेखि मिक्लाजुङको रवि वजार स्थित दुर्गा माविको खेल मैदानमा सुरु हुने प्रतियोगितामा विदेशी २ सहित मोफसलका चर्चित ८ टिमले प्रतिस्पर्धा गर्ने आयोजक राईजिङ स्टार स्र्पोटिङ क्बलले जनाएको छ ।
प्रतियोगिताको उद्घाटन खेलमा आयोजक र युके एफसी, कर्साङ भारतबीच हुने भएको छ । प्रतियोगिताको दोस्रो क्वाटर फाईनलमा चैत्र २६ गते भाङवारी स्पोर्टिङ युथ क्लब, दमक र मोरङको पथरी- ११ एफसीबीच प्रतिस्पर्धा हुनेछ। यसै गरी, तेस्रो क्वाटर फाईनलमा चैत्र २७ गते लाइटगेट फुटबल क्लब, काठमाण्डौं र पाँचथरको आठ कर्ण फुटबल क्लब आमने सामने हुनेछन् । अन्तिम क्वाटर फाईनलमा चैत्र २८ गते सिरहाको सलहेश युथ क्लबले प्रतियोगिताको अर्काे विदेशी टोली राइजिङ स्टार स्पोर्टिङ क्लब, दार्जिलिङसँग प्रतिस्पर्धा गर्नेछ ।
प्रतियोगिताको पहिलो सेमिफाइनल चैत्र २९ र दोस्रो सेमिफाइनल चैत्र ३० गते सञ्चालन गरिने आयोजकले जनाएको छ । प्रतियोगिताको फाईनल २०८२ बैशाख १ गते हुनेछ ।
प्रतियोगिताको विजेताले ५ लाख नगद, ट्रफी, मेडल र प्रमाण पत्र प्राप्त गर्नेछ भने उपविजेताले २ लाख ५० हजार नगद, ट्रफी, मेडल र प्रमाण पत्रमा चित्त बुझाउनु पर्नेछ । हरेक खेलको प्लेयर अफ दी म्याचले ५ हजार रुपैयाँ पाउनेछन् । प्रतियोगिताका सर्वोत्कृष्ट , उदीयमान , सर्वाधिक गोलकर्ता, उत्कृष्ट गोलकिपर, डिफेन्डर, मिडफिल्डर र प्रशिक्षकले पनि पुरस्कार प्राप्त गर्नेछन्।
२०७६ मा कोभिड- १९ को महामारीका कारण स्थगित भएको प्रतियोगिता ५ वर्षपछि पुनः आयोजना हुन लागेको हो। प्रतियोगिताको मुख्य प्रायोजक वाइ वाइ रहेको छ भने प्रबद्धकका रुपमा मिक्लाजुङ गाउँपालिकाले सहयोग गरेको छ ।
प्रकाशित मिति : १८ चैत्र २०८१, मंगलबार ८ : २४ बजे
प्रतिक्रिया