म्यान्मारमा शुक्रवार शक्तिशाली भूकम्प जाँदा मृत्यु हुने मानिसको सङ्ख्या एक हजार नाघेको सरकारी अधिकारीहरूले बताएका छन्।
सैनिक सरकारका अनुसार भूकम्पमा परी २,३०० जनाभन्दा बढी घाइते भएका छन्।
मृत्यु हुनेमा नौजना नेपालीभाषी पनि रहेको त्यहाँस्थित एकजना नेपालीभाषी साहित्यकारले बीबीसीलाई बताए।
“म्यान्डलेमा एक दाहाल परिवारका सातजनाको दुःखद मृत्यु भएको हामीले खबर पाएका छौँ,” बीबीसी न्यूज नेपालीसँग याङ्गुनबाट लक्ष्मण न्यौपानेले भने।
“त्यसैगरी सिम्खडा परिवारका एक र सापकोटा परिवारका एक जनाको मृत्यु भएको अहिलेसम्म पुष्टि भएको छ।”
शुक्रवार राति धेरै नेपालीभाषीहरू फेरि भूकम्प आउन सक्ने डरले खुला आकाशमुनि रात बिताएको आफ्नी फुपूका छोराले सुनाएको न्यौपानेले बताए।
भग्नावशेषभित्र पुरिएका मानिसहरूको खोजी तथा उद्धारकार्य जारी रहेको अधिकारीहरूले बताएका छन्।
भूकम्पको केन्द्रबिन्दुदेखि नजिकै पर्ने म्यान्डलेमा विध्वंसको भयावह दृश्य देखिएको आपत्कालीन सेवासम्बन्धी अधिकारीहरूले उल्लेख गरेका छन्।
“खाली हातले भग्नावशेषहरू पन्छाइरहेका छौँ,” त्यहाँस्थित एउटा टोलीले बीबीसीसँग भन्यो।
त्यस क्षेत्रमा मात्रै सात सय जनाको हाराहारीमा मृत्यु भएको बताइएको छ।
हताहत हुनेहरूले अस्पतालहरू खचाखच भरिएका छन्।
सैनिक सरकार प्रमुखले अन्तर्राष्ट्रिय सहायताका लागि अपील गरेका छन्। तर जारी गृहयुद्धका कारण राहत कार्य प्रभावित हुने ठानिएको छ।
पछिल्ला वर्षहरूमा पश्चिमा देशहरूको तर्फबाट कडा नाकाबन्दी झेल्दै आएको म्यान्मारको सैनिक सरकारले यस्तो अपील गरेको दुर्लभ घटना हो।
विध्वंसकारी भूकम्पपछि उसको छिमेकी भारतले सहायता सामग्री पठाएको छ भने चीनले उद्धारकार्यमा सघाउनका निम्ति १७ सदस्यीय टोली पठाएको त्यहाँको सीसीटीभीले जनाएको छ।
बीबीसीवाट
प्रकाशित मिति : १५ चैत्र २०८१, शनिबार ३ : २९ बजे
प्रतिक्रिया