पाँचौं पाँचथर गोल्डकपको उपाधि नमो बुद्धको पोल्टामा

मंगल बेघा

२ चैत्र, पाँचथर । अन्तराष्ट्रिय आमन्त्रण वाइवाइ पाँचौं पाँचथर गोल्डकप फुटबल प्रतियोगिता– २०८१ को उपाधि नमो बुद्ध युथ फुटबल क्लब, सप्तरीको पोल्टामा परेको छ । फिदिम माविको खेल मैदानमा शनिबार भएको फाईनलमा मछिन्द्र फुटबल क्लब, काठमाण्डौलाई १–० ले स्तब्ध पार्दै मधेश प्रदेशको नमो बुद्धले उपाधि आफ्नो पोल्टामा पारेको हो ।

दर्शकले भरिभराउ खेल मैदानमा दुवै टोली आक्रमक फुटबल पस्किए पनि फाईनलको एक मात्र गोल ७३ औं मिनेटमा भएको थियो । नमो बुद्धका विदेशी खेलाडी एलेक्सले डिबक्स बाहिरवाट ५ जना विपक्षी खेलाडीहरुलाई छकाउँदै गरेको चलाखीपूर्ण प्रहारले सिधै जाली चुमेपछि मछिन्द्र १–० ले पछि परेको थियो । खेलको बाँकी समय कुनै पनि टोलीवाट गोल नभएपछि एलेक्सको गोल नै नमाे बुद्धलाई उपाधि दिलाउन निर्णायक बन्न पुग्यो ।

पहिलो हाफमा मछिन्द्रले पटक-पटक आक्रमण गरे पनि नमो बुद्धका गोलरक्षक जयनाथ शेख बाधक बनेका थिए । पहिलो हाफमा मछिन्द्र हाबी भए पनि स्कोर ननिस्कदा नमो बुद्धले ०–० को बराबरी रोकेको थियो । दोस्रो हाफमा भने नमो बुद्धले बल पोजिसन राख्दै मछिन्द्र विरुद्ध पटक-पटक आक्रमण गरेको थियो ।

फाईनल खेलको म्यान अफ दि म्याच नमो बुद्धका निर्मल घिसिङ घोषित भए । उनले ७ हजार ५ सय नगद र ट्रफी हात पारे । यसै गरी, फ्यान अफ दि म्याच घोषित भएका रोजिता यवा, प्रविना माङमु र शान्ति माङमुले नगद २ हजार ५ सय प्राप्त गरे ।

विजेता र उपविजेताले कति पुरस्कार पाए ?

अन्तराष्ट्रिय आमन्त्रण वाइवाइ पाँचौं पाँचथर गोल्डकप फुटबल प्रतियोगिता– २०८१ विजेता नमो बुद्ध युथ फुटबल क्लब, सप्तरीले ११ लाख १ हजार १ सय ११ रुपैयाँ नगद, ट्रफी, मेडल र प्रमाण पत्र हात पार्यो । याे हालसम्म जिल्लामा भएका फुटबल प्रतियाेगिता मध्येकै सर्वाधिक राशि हाे ।

यसै गरी, उपविजेतामा सीमित मछिन्द्र फुटबल क्लब, काठमाण्डौले ५ लाख ५५ हजार ५ सय ५५ रुपैयाँ नगद सहित ट्रफी, मेडल र प्रमाण पत्रमा चित्त बुझायो । अभागी सावित भएको मछिन्द्रले गत पौषमा यहि खेल मैदानमा आयोजित ११ औं संस्करणको फाल्गुनन्द गोल्डकपको फाईनलमा अन्तिम केही समय सम्हालिन नसक्दा बराबरी गोल खाएपछि टाईब्रेकर चर्च बोइज युनाईटेड, काठमाण्डौंलाई उपाधि सुम्पिएको थियो ।

व्यक्तिगत विधाको पुरस्कार क-कसले पाए ?

अन्तराष्ट्रिय आमन्त्रण वाइवाइ पाँचौं पाँचथर गोल्डकप फुटबल प्रतियोगिता– २०८१ को व्यक्तिगत विधामा समेत उपाधि हात पारेको नमो बुद्धले कब्जा जमाएको छ । नमो बुद्धका खेलाडीले उत्कृष्ट डिफेण्डर र राईजिङ प्लेयर बाहेका सवै उपाधि हात पारेका हुन् ।

नमो बुद्धका धनकुमार तामाङले उत्कृष्ट प्रशिक्षक, जयनाथ शेखले उत्कृष्ट गोलरक्षक, विवेक राईले उत्कृष्ट मिडफिल्डर र प्रतियोगितमा समान ३ गोल गरेका एलेक्स र चर्च बाेइज युनाइटेडका राज भूसाल सर्वाधिक गोलकर्ता घोषित भए । यसै गरी, उत्कृष्ट डिफेण्डर मछिन्द्रका देवेन्द्र तामङ घोषित भए । सवैले जनही १० हजार पुरस्कार र ट्रफी हात पारे । यसै गरी, म्यान अफ दि टुर्नामेन्ट नमो बुद्धका दिपेश चाम्लिङ राई घोषित भए । उनले ३० हजार नगद र ट्रफी हात पारे । राईजिङ प्लेयर घोषित भएका पाँचथर क्लबका निरोज लिङदेनले १५ हजार नगद र ट्रफी हात पारे ।

दुई टोली कसरी फाईनल पुगे ?

अन्तराष्ट्रिय आमन्त्रण वाइवाइ पाँचौं पाँचथर गोल्डकप फुटबल प्रतियोगिता– २०८१ को मछिन्द्र र नमो बुद्धले कठिन प्रतिद्धन्दीहरुलाई पाखा लगाउँदै फाईनलमा भेट पक्का गरेका थिए ।

नमो बुद्धले क्वाटर फाईनलमा विभागीय टोली नेपाल पुलिस क्लब, काठमाण्डौलाई ३–० हराउँदै सेमिफाईनलको यात्रा तय गरेको थियो । सेमिफाईनलमा लिग लिडर चर्च बोइज युनाईटेड, काठमाण्डौलाई पेनाल्टी सुटआउमा ४–२ को सघर्षपूर्ण जित दर्ता गर्दै नमाे बद्ध उपाधि नजिक पुगेको थियाे।

यसै गरी, मछिन्द्रले क्वाटर फाईनलमा हिमालयन शेर्पा क्लबलाई २–१ ले पराजित गर्दै सेमिफाईनल प्रवेश गरेको थियो । अन्तिम चारमा मछिन्द्रले इन्ट्रा पथरी– ११ फुटबल क्लब विरुद्ध ३–१ को जित निकाल्दै फाईनल यात्रा तय गरेको थियो ।

प्रतियोगितामा कति टिम सहभागी थिए ?

गत फागुन २४ गतेदेखि सञ्चालित प्रतियोगितामा ए डिभिजनका ४, १ विदेशी र आयोजक सहित मोफसलका ३ गरी जम्मा ८ टिम सहभागी थिए ।

शहिद स्मारक लिग सञ्चालन नभएपछि विभिन्न प्रतियोगिताहरुमा खेलीरहेका राजधानीका ए डिभिजन क्लबहरु लिग लिडर चर्च बोइज युनाईटेड, मचिन्द्र फुटबल क्लब, हिमालयन शेर्पा क्लब र नेपाल पुलिस क्लब प्रतियोयितामा सहभागि भएका थिए । प्रतियोगितामा एक मात्र विदेशी टोलीका रुपमा हिल्स फुटबल एकेडेमी भारत रहभागी भएको थियो भने आयोजक पाँचथर क्लब सहित मोफसलका इन्ट्रा पथरी ११ फुटबल क्लब, मोरङ र च्याम्पियन नमो बुद्ध युथ क्लब, सप्तरी सहभागी भएका थिए ।

प्रकाशित मिति : १ चैत्र २०८१, शनिबार  ८ : २४ बजे