पाँचथर गोल्डकप : फाईनलमा नमो बुद्ध र मछिन्द्र भिड्दै

मंगल बेघा

१ चैत्र, पाँचथर । फिदिममा जारी अन्तराष्ट्रिय आमन्त्रण वाइवाइ पाँचौं पाँचथर गोल्डकप फुटबल प्रतियोगिता– २०८१ को फाईनलमा नमो बुद्ध युथ फुटबल क्लब, सप्तरी र चर्च बोइज युनाईटेड, काठमाण्डौं भिडदै छन् ।

फिदिम माविको खेल मैदानमा शनिबार दिउँसो २ः३० वजे हुने खेलमा दुवै टोलीको स्पष्ट नजर ११ लाख नगद र च्याम्पियनको ट्रफीमा हुनेछ । शुक्रबार आयोजित प्रि–म्याच कन्फ्रेन्समा दुवै टोलीका प्रशिक्षकले उपाधि कब्जा गर्ने दावी गरेका छन् ।

यस अघिका दुवै खेलमा ए डिभिजन क्लबहरुलाई हराएको नमो बुद्धले सोही लयलाई निरन्तरता दिन चाहन्छ । उसका एलेक्स विलियम, जेम्स प्रजापति, दिपेश चाम्लिङ राई जस्ता स्तरीय खेलाडीकाे आक्रमणलाई रोक्नु मछिन्द्रका लागि चुनौती हुनेछ । नमो बुद्धका प्रशिक्षक सुरेश लामाले विना दवाव फाईनल खेल्ने बताए । उनले टिममा यूवा र विदेशी खेलाडीको साथले उपाधि कब्जा गर्ने बताए ।

मछिन्द्रले अनुभवी खेलाडी र खेल मैदानको अनुभवले गर्दा उपाधि कब्जा गर्ने जनाएको छ । मछिन्द्रका प्रशिक्षक सबिन अधिकारीले यस अघिका गल्तीलाई सुधार गर्दै उपाधि कब्जा गर्ने बताए । मछिन्द्रसँग अनुवभी डिफेण्डर देवेन्द्र तामाङ, जय गुरुङ, विशाल घलान, विदेशी खेलाडीहरु स्टेफेन, इब्राहिम, युसुफ मल्लिक जस्ता स्तरीय खेलाडीको साथ छ । गत पुषमा यही खेल मैदानमा भएकाे फाल्गुनन्द गाेल्डकपकाे फाईनलमा चर्च बाेइज युनाइटेडलाई उपाधि सुम्पिएकाे थियाे ।

नमो बुद्धले क्वाटर फाईनलमा विभागीय टोली नेपाल पुलिस क्लब, काठमाण्डौलाई ३–० हराउँदै सेमिफाईनलको यात्रा तय गरेको थियो । सेमिफाईनलमा लिग लिडर चर्च बोइज युनाईटेड, काठमाण्डौलाई पेनाल्टी सुटआउमा ४–२ को सघर्षपूर्ण जित दर्ता गर्दै उपाधि नजिक पुगेको हो ।

यसै गरी, मछिन्द्रले क्वाटर फाईनलमा हिमालयन शेर्पा क्लबलाई २–१ ले पराजित गर्दै सेमिफाईनल प्रवेश गरेको थियो । अन्तिम चारमा मछिन्द्रले इन्ट्रा पथरी– ११ फुटबल क्लब विरुद्ध ३–१ को जित निकाल्दै फाईनल यात्रा तय गरेको थियो ।

प्रतियोगिताको विजेताले जिल्लाको हालसम्मकै सर्वाधिक राशिको पुरस्कार ११ लाख १ हजार १ सय ११ रुपैयाँ प्राप्त गर्नेछ भने उपविजेताले ५ लाख ५५ हजार ५ सय ५५ रुपैयाँमा प्राप्त गर्ने आयोजक पाँचथर क्लबका सचिव प्रदिप भण्डारीले जानकारी दिए । उत्कृष्ट प्रशिक्षक, गोलरक्षक, डिफेण्डर, मिडफिल्डर र सर्वाधिक गोलकर्ताले जनही १० हजार पुरस्कार पाउनेछन् । यसै गरी, म्यान अफ दि टुर्नामेन्ट र राईजिङ प्लेयरले जनही १५ हजार पुरस्कार प्राप्त गर्ने छन् । म्यान अफ दि म्याचले ७ हजार ५ सय र फ्यान अफ दि म्याचले २ हजार ५ सय प्राप्त गर्ने सचिव भण्डारीले जानकारी दिए ।

प्रतियोगिता सञ्चालन गर्न करिब ७० लाख खर्च हुने क्लबका उपाध्यक्ष योगराज सेढाईले बताए । फिदिम नगरपालिका मूख्य प्रवद्र्धक रहेको प्रतियोगिता सम्पन्न गर्न राष्ट्रिय खेलकुद परिषद, प्रदेश खेलकुद विकास बोर्ड, पाँचथरका अन्य स्थानीय तहहरु, देशविदेशका सहयोगी दाताहरुका साथै टिकेट विक्रीवाट आवश्यक रकम संकलन गरिने उपाध्यक्ष सेढाँईले जानकारी दिए ।

प्रतियोगितामा ए डिभिजनका ४, १ विदेशी र आयोजक सहित मोफसलका ३ गरी जम्मा ८ टिम सहभागी थिए ।

प्रकाशित मिति : ३० फाल्गुन २०८१, शुक्रबार  ८ : १४ बजे