पाँचथर गोल्डकप : आज चर्च बोइज र भारतको हिल्स एकेडेमी भिड्दै

मंगल बेघा

२५ फागुन, पाँचथर । अन्तराष्ट्रिय आमन्त्रण पाँचौं पाँचथर गोल्डकप फुटबल प्रतियोगिता– २०८१ मा आज (आइतबार) चर्च बोइज युनाईटेड फुटबल क्लब काठमाण्डौं र हिल्स फुटबल एकेडेमी भारत भिड्दैछन् ।

फिदिम माविको खेल मैदानमा दिउँसो २ः३० वजे हुने प्रतियोगिताको दोस्रो क्वाटर फाईनलमा ए डिभिजनको लिग च्याम्पियन चर्च बोइजले प्रतियोगिताको एक मात्र विदेशी टोली हिल्स एकेडेमीको सामना गर्न लागेको हो । चर्चसँग विदेशी खेलाडीको साथ र खेल मैदानको अनुभव छ भने हिल्स स्तरीय खेलाडीका साथ अन्तिम चारको लक्ष्यसहित मैदान उत्रने छ । यहि मैदानमा गत पौष १५ गते सम्पन्न ११ औं संस्करणको फाल्गुनन्द गोल्डकपको उपाधि उचालेको चर्च सोही सफलतालाई निरन्तरता दिन चाहन्छ ।

शनिबार भएको उद्घाटन खेलमा आयोजक पाँचथर क्लब विरुद्ध २–० को जित दर्ता गर्दै इन्ट्रा पथरी– ११ फुटबल क्लब मोरङ सेमिफाईनलमा प्रवेश गरेको छ ।

खेलको म्यान अफ दि म्याच घोषित भएका पथरी– ११ का गोलरक्षक समित क्षत्रीेले नगद ७ हजार ५ सय पुरस्कार र ट्रफी प्राप्त गरे । यसै गरी, फ्यान अफ दि म्याच घोषित फिदिम– १२ की सुनिता राईले २ हजार ५ सय पुरस्कार पाईन् ।

प्रतियोगिताको विजेताले जिल्लाको हालसम्मकै सर्वाधिक राशिको पुरस्कार ११ लाख १ हजार १ सय ११ रुपैयाँ प्राप्त गर्नेछ भने उपविजेताले ५ लाख ५५ हजार ५ सय ५५ रुपैयाँमा प्राप्त गर्ने पाँचथर क्लबका सचिव प्रदिप भण्डारीले जानकारी दिए । हरेक खेलको म्यान अफ दि म्याचले ७ हजार ५ सय प्राप्त गर्नेछ भने उत्कृष्ट प्रशिक्षक, गोलरक्षक, डिफेण्डर, मिडफिल्डर र सर्वाधिक गोलकर्ताले जनही १० हजार पुरस्कार पाउनेछन् । यसै गरी, म्यान अफ दि टुर्नामेन्ट र राईजिङ प्लेयरले जनही १५ हजार पुरस्कार प्राप्त गर्दा हरेक खेलको फ्यान अफ दि म्याचले २ हजार ५ सय प्राप्त गर्ने सचिव भण्डारीले जानकारी दिए ।

आगामी चैत्र ४ गतेसम्म आयोजना हुने प्रतियोगितामा ए डिभिजनका ४, १ विदेशी र आयोजक सहित मोफसलका ३ गरी जम्मा ८ टिम सहभागी छन् । प्रतियोगिता सञ्चालन गर्न करिब ७० लाख खर्च हुने क्लबका उपाध्यक्ष योगराज सेढाईले बताए । फिदिम नगरपालिका मूख्य प्रवद्र्धक रहने प्रतियोगितालाई सम्पन्न गर्न राष्ट्रिय खेलकुद परिषद, प्रदेश खेलकुद विकास बोर्ड, पाँचथरका अन्य स्थानीय तहहरु, देशविदेशका सहयोगी दाताहरुका साथै टिकेट विक्रीवाट आवश्यक रकम संकलन गरिने उपाध्यक्ष सेढाँईले जानकारी दिए ।

प्रकाशित मिति : २५ फाल्गुन २०८१, आइतबार  ७ : २७ बजे